Иргэд, олон нийтэд Үндэсний баялгийн сангийн талаар мэдээлэл өгч, санал хүсэлт хүлээн авч ажиллаж байна
Аж үйлдвэр, эрдэс баялгийн яам, Эрчим хүчний яамны хамтарсан нээлттэй хаалганы өдөрлөг төв талбайд болж байгаа бөгөөд тус өдөрлөгт “Чингис хаан Үндэсний баялгийн сан” ХХК оролцож иргэдэд мэдээ, мэдээлэл өгч, санал хүсэлт хүлээн авч ажиллаж байна. Мөн Үндэсний баялгийн сангийн төрөлжсөн сан болох Хуримтлалын сан дахь нэрийн дансаа хэрхэн шалгах талаар тусламж, дэмжлэг үзүүлж байна.
“Чингис хаан Үндэсний баялгийн сан” ХХК нь эх орны эрдэс баялгийн өгөөжийг өнөөгийн болон ирээдүйн иргэддээ шударгаар хүртээх зорилгын хүрээнд ил тод нээлттэй байх, олон нийтийн хяналт тавих нөхцөл боломжийг бүрдүүлэх, Үндэсний баялгийн санд тогтвортой, хараат бус, мэргэжлийн менежмент, хөрөнгө удирдлага хэрэгжүүлэх зэрэг бэлтгэл ажлыг ханган ажиллаж байгаа билээ.
Үндэсний баялгийн сан нь Ирээдүйн өв сан, Хуримтлалын сан, Хөгжлийн сан гэсэн гурван төрөлжсөн сантай.
Олон нийтээс хамгийн их асуудаг Хуримтлалын сангийн талаар мэдээлэл хүргэе.
Хуримтлалын сан нь иргэдийн оролцоонд суурилсан байх бөгөөд цаашид иргэдийн орон сууц, боловсрол, эрүүл мэндийн хэрэгцээг хангахад чиглэсэн дэмжлэг, үйлчилгээг санхүүжүүлэх зорилготой юм.
Та E-Mongolia => “Профайл”хэсэг => “Төрд байгаа миний мэдээлэл” => “Чингис хаан Үндэсний баялгийн сан” гэсэн алхмаар нэрийн дансан дахь хуримтлалаа шалгаарай.
Таны дансанд орж буй орлого нь газрын хэвлий дэх байгалийн баялгийн өгөөжийг одоо ба ирээдүйн иргэдэд тэгш хүртээх Үндэсний баялгийн сангийн тухай хуулийн хэрэгжилтийн хүрээнд бий болж буй хуримтлал юм.
Одоогийн байдлаар “Эрдэнэс Монгол” нэгдлийн уул уурхайн компаниудын төрд ногдох ногдол ашгийн 34% төвлөрч байна.
