Олон улсын баялгийн сангуудын форум (IFSWF) Монгол Улсын баялгийн сангийн шинэчлэлийг онцоллоо

Олон улсын баялгийн сангуудын форум (IFSWF)-аас гаргадаг ээлжит мэдээллийн товхимолд манай байгууллагын шинэчлэл, олон улсын түвшинд хүрч ажиллаж буй үр дүнгийн талаар онцолжээ.

Тус нийтлэлд Монгол Улсын Засгийн газрын 2026 оны 5 дугаар сарын 27-ны өдрийн түүхэн шийдвэрээр “Чингис хаан Үндэсний баялгийн сан” ХХК болон “Эрдэнэс Монгол” ХХК-ийг нэгтгэн “Чингис хаан баялгийн сан нэгдэл” болгон өөрчилж буйг олон улсын стандартад нийцсэн, урт хугацааны хөгжлийн зорилттой уялдуулан ажиллах мэргэжлийн удирдлага бүхий баялгийн сан болгож буй “томоохон шилжилт” хэмээн онцлон тэмдэглэсэн байна.

Мөн шинэ нэгдлийн дараах үйл ажиллагаа болон ололт амжилтуудыг сайшаан онцолжээ. Үүнд:

• Стратегийн ач холбогдол бүхий уул уурхайн хөрөнгийг мэргэжлийн түвшинд удирдах, стратегийн хөрөнгө оруулалт хийх болон дотоодын хөрөнгийн зах зээлийг хөгжүүлэх мандаттай болсон байдал.
• Байгуулагдсан цагаасаа хойш сангийн жилийн дундаж өсөлтийг 30 орчим хувьд хүргэж, дэлхийн хөрөнгө оруулагчдын нийгэмлэг, тэр дундаа IFSWF-тэй бат бэх харилцааг бий болгосон эерэг үзүүлэлт.
• Давхардсан бүтэцтэй, ашиггүй ажиллаж буй охин компаниудыг татан буулгаж, захиргааны зардлыг эрс бууруулснаар байгууллагын бүтцийг Үндэсний баялгийн сангийн тухай хуультай нийцүүлсэн шинэчлэл.
• Энэхүү өөрчлөлт нь байгалийн баялаг арвинтай манай улсын хувьд олон улсын жишигт нийцсэн, тогтвортой институтийг бий болгож буй урам зориг өгөхүйц жишээ болсныг IFSWF-ээс дүгнэсэн байна.

Эх сурвалж: https://www.ifswf.org/