“Эрдэнэс Монгол” нэгдлийг Үндэсний баялгийн сангийн тухай хуульд заасан үндсэн чиг үүрэгт бүрэн шилжүүлнэ
Монгол Улсын Засгийн газрын 2026 оны тавдугаар сарын 27-ны өдрийн ээлжит хуралдаанаар “Эрдэнэс Монгол” нэгдлийг Үндэсний баялгийн сангийн тухай хуульд заасан чиг үүрэгт бүрэн шилжүүлж, “Чингис хаан Үндэсний баялгийн сан корпорац” болгон өөрчлөн зохион байгуулах шийдвэрийг Засгийн газрын хуралдаанаас гаргалаа.
Энэ хүрээнд нэгдлийг уул уурхайн салбарын хяналт, удирдлагын уламжлалт бүтэцтэй байгууллагаас төрийн өмчийн хөрөнгийн удирдлага, хөрөнгө оруулалт, баялгийн сангийн менежмент, IPO болон хувьчлал хариуцсан олон улсын жишигт нийцсэн санхүүгийн мэргэжлийн институт болгон үе шаттайгаар шинэчлэх юм.
Ингэснээр төрийн өмчит уул уурхайн компаниудын хөрөнгийн удирдлагыг сайжруулж, байгалийн баялгийн өгөөжийг иргэдэд илүү хүртээмжтэй, урт хугацааны өгөөжтэй байдлаар хүргэх нөхцөл бүрдэнэ.
Үндэсний баялгийн сан нь олон улсад данстай, Олон улсын баялгийн сангуудын холбоонд (IFSWF) бүртгэлтэй бөгөөд засаглалын зохистой зарчмаар мэргэжлийн хөрөнгийн удирдлагыг хэрэгжүүлэх суурь бодлогын судалгаануудыг хийсэн.
Дэлхийд нийт 100 гаруй баялгийн сан үйл ажиллагаа явуулж байгаагаас 20 орчим Баялгийн сантай удирдлагын болон мэргэжлийн түвшинд цахимаар харилцаа тогтоож, сайн туршлагаас нутагшуулан ажиллаж байна.
2030 оноос иргэд Хуримтлалын сан дахь хөрөнгөө орон сууц, эрүүл мэнд, боловсролын санхүүжилтийн дэмжлэгийг хэрхэн авахыг урьдчилан зохион байгуулахаар ажиллаж байна.
Хөгжлийн сандаа хэрхэн эх үүсвэр татах, олон улсын зах зээлд суурилсан, гадаадын хөрөнгө оруулалт татах шинэ санхүүгийн хэрэгслүүдийг боловсронгуй болгох урьдач судалгааг хийсэн.
Цаашид “Чингис хаан Үндэсний баялгийн сан" ХХК "Эрдэнэс Монгол" нэгдэлтэй нэгдэж, "Чингис хаан Үндэсний баялгийн сан корпорац" болон илүү далайцтай гадаадын хөрөнгө оруулалтыг Монголын стратегийн ач холбогдолтой, төсөл хөтөлбөрүүдэд оруулж ирэх, шинэ хөрөнгийн урсгалыг бий болгох, Үндэсний баялгийн сангаа зүй зохистой, ил тод засаглалтай, иргэдэд нээлттэй удирдан арвижуулж, үнэ цэнийг өсгөх, иргэдэд бодит үнэ цэнийг хүртээх чиглэлээр хамтарч ажиллах болно.
