Монгол дахь Америкийн Худалдааны танхимын урилгаар Чингис хаан Үндэсний баялгийн сангийн талаар мэдээлэл өглөө
“Чингис хаан Үндэсний баялгийн сан” ХХК-ийн гүйцэтгэх захирал Б.Тэмүүлэн Монгол дахь Америкийн Худалдааны танхим (AmCham Mongolia)-ын гишүүд болон олон улсын байгууллага, дипломат төлөөлөгчдөд сангийн талаар мэдээлэл өглөө.
Уулзалтаар 2024 онд батлагдсан Үндэсний баялгийн сангийн тухай хууль болон Ирээдүйн өв сан, Хуримтлалын сан, Хөгжлийн сангийн өнөөгийн нөхцөл байдал, макро тогтвортой орчныг хангахад үзүүлж буй эерэг нөлөөллийн талаар танилцууллаа. Мөн Баялгийн сан Монгол Улсын зээлжих зэрэглэлийг нэмэгдүүлэхэд эерэг нөлөө үзүүлсэн талаар болоод хямд бонд гаргахад нөлөөлж буй зэрэг мэдээлэл өглөө.
Компанийн зүгээс үйл ажиллагаандаа олон улсын баялгийн сангуудын нийтлэг жишиг болох Сантьягогийн зарчмыг нэвтрүүлж, бие даасан, хариуцлагатай, ил тод хөрөнгө оруулалтын менежментийн бэлтгэлийг хангахад онцгой анхаарч буйг дурдлаа.
Энэ үеэр Монгол дахь Америкийн Худалдааны танхимын Гүйцэтгэх захирал О.Адъяа байгалийн баялгийн үр өгөөжийг иргэдэд тэгш, шударгаар хүртээх зорилтын хүрээнд Үндэсний баялгийн санд тогтвортой, олон улсын жишигт нийцсэн хөрөнгийн удирдлагын тогтолцоог бүрдүүлэх, хувийн хэвшилтэй харилцан ойлголцох талаар зорин ажилаж буйд талархал илэрхийлэв. Танилцуулга мэдээллийн дараа AmCham-ын гишүүн байгууллагуудын төлөөлөл сонирхсон асуултдаа хариулт авч, санал солилцсон юм.
