Чингис хаан Үндэсний баялгийн сан Милькений Азийн Дээд Хэмжээний Чуулган 2025-д оролцлоо
Чингис хаан Үндэсний баялгийн сан (ЧХҮБС) нь Сингапур улсад 10 дугаар сарын 1-ээс 3-ны өдрүүдэд зохион байгуулагдсан нэр хүндтэй Милькений Хүрээлэнгийн Азийн Дээд Хэмжээний Чуулган 2025 арга хэмжээнд Монгол Улсыг төлөөлөн амжилттай оролцлоо. "Зорилготой хөгжил" уриан дор болсон тус чуулганд Ази болон дэлхийн ирээдүйг тодорхойлох тулгамдсан асуудал, боломжуудыг хэлэлцэхээр дэлхийн 1,200 гаруй манлайлагч, хөрөнгө оруулагчид цуглав.
ЧХҮБС-ийн оролцоо нь сангийн олон улс дахь нэр хүндийг өсгөх, түншүүдтэй харилцаа тогтоох, баялгийн тогтвортой менежментийн талаарх Монгол Улсын урт хугацааны алсын харааг таниулахад чиглэсэн байв. Гүйцэтгэх захирал Б.Тэмүүлэн чуулганы үйл ажиллагаанд өндөр үүрэг гүйцэтгэж, хоёр өндөр түвшний хэлэлцүүлэгт илтгэгчээр оролцон санал бодлоо хуваалцлаа.
Геополитикийн сорилт, технологийн хувьслын үеийн манлайллын асуудалд төвлөрсөн Гүйцэтгэх захирлуудын өглөөний уулзалтын үеэр Б.Тэмүүлэн ЧХҮБС-ийн Монгол Улсын Үндсэн хуульд үндэслэсэн онцгой мандат болох шавхагдах баялгийг бүх үеийнхэнд зориулсан мөнхийн баялаг болгон хувиргах зорилгыг онцлон тэмдэглэв. Тэрээр сангийн суурь стратеги болох бие даасан засаглалаар хамгаалагдсан, урт хугацааны, зорилготой мандатаар дамжуулан ач холбогдлоо хадгалдаг, тэсвэртэй, "дижиталд суурилсан" институцийг байгуулах ажлыг танилцуулсан юм. Мөн Монгол Улсын стратегийн ашигт малтмалын нийлүүлэлтийн сүлжээ болон сэргээгдэх эрчим хүчний салбарт эзлэх боломжит байр суурь зэрэг сангийн алсын харааг тодорхойлох гол чиг хандлагуудыг хөндлөө.
"Үнэлгээ, хэлбэлзэл ба хуναас хувьцааны ирээдүй" сэдэвт хэлэлцүүлэгт хатагтай Б.Тэмүүлэн дэлхийн шилдэг туршлага болох Сантьягогийн зарчимд нийцсэн бат бөх засаглалын тогтолцоог хөрөнгө идэвхтэй удирдаж эхлэхээс өмнө бүрдүүлэхийн чухлыг онцолж, сахилга баттай, мөчлөг сөрсөн хөрөнгө оруулалт хийх үүрэг хүлээсэн шинээр гарч ирж буй үндэсний хөрөнгө оруулагчийн байр суурийг илэрхийлэв.
Дэлхийн хамгийн шинэ үндэсний баялгийн сангуудын нэг болох ЧХҮБС-ийн Милькений Хүрээлэнгийн Азийн Дээд Хэмжээний Чуулганд оролцсон нь Монгол Улс ил тод, мэргэжлийн, дэлхийд интеграцчилагдсан институцийг бүтээн байгуулах амлалтыг нотоллоо. Тус сан нь Монгол Улсын баялгийг хариуцлагатай удирдаж, ирээдүй хойч үедээ тогтвортой үнэ цэн бүтээж, үндэсний тэсвэртэй байдлыг бэхжүүлэх суурь ажлаа үргэлжлүүлсээр байна.
